Portada y contraportada del libro de poesías de Gonzalo Alonso Sánchez.
Hoy quiero traeros una de las muchas que escribió en serradillano y que siempre gustaron tanto a sus paisanos. Esta simula la riña de dos vecinas por esas cosas que siempre hay entre gente que convive a diario y un día explota y dicen... ¡estas cosas!
Cosas de mujeres
________________________________
_________________________
___________________
¿Que me idis del salmoregi
que armarun las tus vedinas?
Tú bien t'habrás enterau
porque te pilla mu encima.
No es comu yo, qu'estoy lejus
y cuandu te lo apesquidas,
ya s'acabau tó el saineti
comu me pasó aquel día,
que cuandu juí, solu queaban
corrillus en las esquinas.
¡Creu que la formarun gorda!
¡Me hubiera gustau oillas!...
Ya ves que eran uña y carni,
y siempri estaban metías
la una, pa en cá la otra
criticandu a las vedinas,
dali que dali a la lengua
y sin jadel ná en tó el día.
Era comu muchu extremu,
y esu, ya se suponía
qu'estas tenían que acabal
desollándusi ellas mismas.
-¡Calla! ¡Déjamí contalti,
que aquellu jué casu e risa!
Yo no se comu empezarun,
peru m'asomé al oillas
idilsi unus dicharachus
que yo, jahta me creía
que s'agarraban del moñu;
porque la gorda, la idia
a la otra: "¡Sanguijuela!...
¡que ya me tienis mu frita!
¡Guarra! ¡Lávati esa cara
que la tienis percuía!"
-¡Sal aquí que si t'agarru
te voy a jadel papilla!
-¡Mira tú (la idia la otra)
la flamencona! Creía
qu'era la reina d'España,
y pa esu no tenía
que agolel tantu a cochambri
comu agüeli to lol días.
-¡Anda allá so gordinflona
que na mas tienis barriga!
-¡Mira la mosquita muerta,
si paici una lagartija
que si la pisu la aplastu!
¡Si tié la jeta de avispa
y el colol del paludismu!...
Perdona que te lo diga
peru yo se que te he vistu
pintalti toitus los días
lo mismitu que una mona...
(A tó estu, salta la chica).
-Madre, se lo diga prontu
antis qu'ella mos lo diga!
-Peru... si es que no m'acuerdu...
¿Que es lo que tengu que idilla?
-Aquellu que usté me dihu
que se lo diri'algún día.
Se lo diga usté ahora mesmu...
¡que s'enterin las vedinas!
-¿Cual era... ¡Ahhhhh!
¡ya m'acuerdu!...
si en la lengua lo tenía...
¡ahora mesmu se lo espetu!
"Tu que tantu vas a misa
a dalti golpis de pechu
y a tomal agua bendita,
tengu que idilti una cosa:
Tu eris una femenina".
-¡Peru...! ¿que me idi la bruja?
¡Válgami Dios, madre mía!
¡Soy una mujel honrá!
¡mas que tú y que la tú hija!
¡que levantais esus falsus
porque me teneis envidia!
La rechinarun los dientis
y cayó patas arriba.
Toitas s'arremolinarun
y allí naidi s'entendía:
-¡Correl a llamal al méicu
y que se venga enseguía!
Que traiga los achiperris
pa jadella una sangría,
polque ya está boqueandu
y tié las manus mú frías.
-Peru yo no apesquidé
polque sería "femenina".
-¡Pos no será ná de buenu!
Y algu de verdá tendría.
Cuandu la otra lo diju...
¡Alguna cosa sabría!
Y si la dió aquel perrengui...
¡Sabi Dios lo que sería!
Gozalo Alonso.
De su libro Poesías completas de Gonzalo Alonso. Publicado en agosto de 1994